恩言,媽媽今次想寫下你的一次經歷, 讓你日後看見的時候, 能知道, 將來能成為你的幫助。
2022年的12月聖誕節, 你有一個長假期, 所以媽媽幫你報讀了崇真幼稚園5天的聖誕課程。你當時係3歲3個月。頭兩天的聖誕課程, 因為爸爸媽媽都放假, 所以可以送你返學, 接你放學, 第一天帶你返學的時候, 媽媽還很擔心你會喊喊, 所以一路入課室的時候, 跟你說一下其他事情。感恩順利地渡過了第一天, 媽媽還鬆口氣。連續兩天跟你一齊返學放學, 之後就同你去元氣壽司食烏冬同紫菜。然後再帶你入元朗的開心農莊玩, 第一日就同你班的同學仔BBQ, 燒野食, 第二日就同另班人, 你同年同月同日出世的朋友仔。2日都好開心, 好快就過左。
呢個聖誕課程剩下3天, 媽媽請了嫲嫲幫手, 早上同你坐的士返學, 爸爸午飯的時候再接你同嫲嫲返婆婆到食飯。頭2日你都好似沒問題, 幾好, 但最了最後一日你好似好唔開心, 好大情緒, 媽媽唔知你發生咩事, 但好情緒, 好容易唔開心, 夜晚訓覺仲訓得好差, 個人忟忟憎憎咁.... 媽媽感受到你裡面發生了一些事, 但你又唔識講, 表達唔到..... 媽媽心很痛。覺得是因為媽媽帶你去了新學校, 太大壓力,太多轉變可能令你吃不消, 要崩潰了。連續好幾晚, 你都訓得唔好, 半夜就會忟忟憎憎咁發脾氣, 喊..... 爸爸媽媽安撫你都無用, 裡面好嬲, 好唔開心。
12月31日假期, 爸媽打算帶你去散心, 忘記唔開心的事情, 去左大棠騎馬馬, 玩車車, 然後仲同Him Him 弟弟瑤姨姨一家一齊踩家庭車, 跟住夜晚去左Him Him 弟弟屋企食飯同玩。這一日你好倦, 坐車時你就已經訓了。
到了1月2日這一天爸媽早上帶了你去九龍灣單車公園打算租車俾你踩下單車, 但你唔踩, 然後去左玩搖控車, 再去左公園玩左一陣, 去爸爸公司到食午餐, 食完午餐我地去左玩跳彈床, 你話你今日玩得好開心。下午瑤姨姨一家同Alex 叔叔黎我地屋企食飯開Party, 這一晚你可能睇得太多電視, 還是因為臨訓前媽媽用布偶公仔問你關於返聖誕班的事, 令你勾起了唔開心的事? 半夜醒來又喊, 又發脾氣, 媽媽抱住你, 你仍然不停地喊, 不停地嗌..... 裡面好似好委屈, 好唔開心, 然後媽媽跟你對不起, 唔應該為你這樣安排, 爸爸也跟你對不起, 不懂得怎樣關愛你。你哭了很久很久......爸爸媽媽一齊為你禱告交給神, 慢慢你哭得太久了, 終於訓了。
1月3日 你的心情好了一點, 沒有再那麼情緒化, 爸媽要返工了, 送你去婆婆屋企的時候, 你問媽媽要唔要返學, 媽媽告訴你不用返那間學校喇, 今日也叫左嫲嫲唔好黎, 擔心你見到嫲嫲, 可能會唸起學校的事情。然後這一晚媽媽用布偶公仔同你玩, 問你關於學校上堂的事, 你告訴我你唔鍾意那位英文老師, 他會鬧人。可能因為咁令你好驚, 當時媽媽好似仍未能解開你的心結。
1月4日, 你返學喇, 今日媽媽答應你送你返學, 你好叻喎, 無喊, 然後夜晚媽媽又再跟你玩布偶的玩具, 今次一講到上英文堂的老師, 媽媽就扮演了超人的角色, 跟你一起對付這個唔好的老師, 讓你知道你不是一個人面對他的, 媽媽跟你在一起。然後媽媽見到你笑了, 開心返... 媽媽想你不要再記住唔開心的事情, 媽媽想你只要記住開心的事情就好了。這一晚你訓得好左, 仍有少少唔開心又或者可能你發夢。
到了昨晚1月5日, 媽媽發現你這2天的情緒都平靜安穩左, 到了晚上媽媽又跟你玩布偶玩具, 然後你又再想扮演上堂的情形, 今次媽媽就話我地唔好喇, 今次媽媽變魔術變走儂儂, 然後" Ma le Ma 空 變返儂儂出黎, 我倆玩得好開心。今晚媽媽感覺你訓得好安穩, 而且無再恔恔憎憎喇。終於媽媽覺得你得釋放了, 係恐懼同嬲入面釋放了, 又或者是因為媽媽也得釋放, 所以你也釋放了? 😅無論怎樣, 恩言, 媽媽想你只記住開心的事情就好, 唔開心的事不要也不用記住, 由他過去, 原諒所有人, 也原諒你自己。媽媽只想你開開心心, 健健康康咁生活。無謂少事情令自己唔開心。
每次見到你笑, 媽媽就最開心, 最滿足! 💓💓💓💓爸媽都好愛你啊!
